ప్రజలకు వైద్య సేవల్లో అంతరాయం కలగకుండా చర్యలు చేపట్టాలి

ముప్పారం ఆయుష్మాన్ ఆరోగ్య మందిర్‌ను తనిఖీ చేసిన డీఎంహెచ్‌ఓ డాక్టర్ అప్పయ్య

హనుమకొండ, అక్టోబర్ 24: జాతీయ ఆరోగ్య మిషన్ ఉద్యోగుల సమ్మె ప్రభావం ప్రజలకు అందించే వైద్య సేవలపై పడకుండా తగిన చర్యలు తీసుకోవాలని హనుమకొండ జిల్లా వైద్య ఆరోగ్య శాఖాధికారి డాక్టర్ అప్పయ్య సంబంధిత వైద్య అధికారులు, సిబ్బందికి సూచించారు.

ధర్మసాగర్ ప్రాథమిక ఆరోగ్య కేంద్రం పరిధిలోని ముప్పారం గ్రామంలో ఉన్న ఆయుష్మాన్ ఆరోగ్య మందిర్‌ను శనివారం సందర్శించిన ఆయన, అక్కడ ప్రజలకు అందిస్తున్న వైద్య సేవలను పరిశీలించారు. ఆరోగ్య కేంద్రంలో నిర్వహిస్తున్న రికార్డులు, రిజిస్టర్లు, వివిధ ఆరోగ్య కార్యక్రమాలకు సంబంధించిన వివరాలను తనిఖీ చేసి, వైద్య సేవల అమలుపై సమీక్ష నిర్వహించారు.

ప్రజలకు అందిస్తున్న ప్రాథమిక వైద్యం, ఆరోగ్య పరీక్షలు, తల్లీబిడ్డల సంరక్షణ, వ్యాధుల నివారణ, ఆరోగ్య అవగాహన కార్యక్రమాలు సక్రమంగా కొనసాగుతున్నాయా లేదా అనే అంశాలను పరిశీలించారు. ఆరోగ్య కేంద్రానికి వచ్చే రోగులకు సకాలంలో వైద్య సహాయం అందించాలని, అత్యవసర వైద్య సేవలతో పాటు ప్రాథమిక ఆరోగ్య సేవలు నిరంతరాయంగా కొనసాగించాలని సూచించారు.

జాతీయ ఆరోగ్య మిషన్ ఉద్యోగులు సమ్మెలో ఉన్నప్పటికీ ప్రజలు వైద్య సేవల కోసం ఇబ్బందులు పడకుండా ప్రత్యామ్నాయ ఏర్పాట్లపై దృష్టి సారించాలని డాక్టర్ అప్పయ్య తెలిపారు. ప్రజారోగ్య పరిరక్షణ ప్రభుత్వ ప్రధాన లక్ష్యమని, ఆరోగ్య కేంద్రాల్లో రికార్డులను పకడ్బందీగా నిర్వహిస్తూ వైద్య సేవల నాణ్యతను నిరంతరం పర్యవేక్షించాలని సిబ్బందిని ఆదేశించారు.

జిల్లా వైద్య ఆరోగ్య శాఖాధికారి కార్యాలయం, హనుమకొండ జిల్లా