మిత్రత్వానికి ప్రతిరూపం.. ఆపదలో అండగా నిలిచిన పూర్వ విద్యార్థులు

వరంగల్ జిల్లా, ధర్మారం:
చదువుకున్న రోజుల్లో ఏర్పడిన స్నేహబంధం.. కాలం గడిచినా చెదరలేదు. ఒకే పాఠశాలలో చదువుకున్న మిత్రులు.. సంవత్సరాలు గడిచినా తమ స్నేహాన్ని కొనసాగిస్తూ, ఆపదలో ఉన్న తోటి మిత్రులకు అండగా నిలుస్తున్నారు.
వరంగల్ జిల్లా ధర్మారం జెడ్‌పీహెచ్‌ఎస్ పాఠశాలలో 1993–94 బ్యాచ్‌కు చెందిన పూర్వ విద్యార్థులు మిత్రత్వానికి సరికొత్త నిర్వచనం చెబుతున్నారు. తమ బ్యాచ్‌కు చెందిన మిత్రులు ఎవరైనా ఆపదలో ఉన్నప్పుడు పరస్పరం సహకరించుకోవాలనే ఉద్దేశంతో ఏర్పాటు చేసుకున్న “పరపతి సంఘం” మరియు మిత్రుల కలయికతో సేవా కార్యక్రమాలు నిర్వహిస్తున్నారు.
ఇటీవల తమ తోటి మిత్రుడు గాదే సుగుణాకర్ మరణించడంతో ఆయన కుటుంబం ఆర్థిక ఇబ్బందుల్లో ఉన్న విషయాన్ని తెలుసుకున్న పూర్వ విద్యార్థులు.. తమ వంతు బాధ్యతగా ముందుకు వచ్చారు. మిత్రులందరి సహకారంతో రూ.88,500 ఆర్థిక సహాయాన్ని సుగుణాకర్ కుటుంబానికి అందజేశారు.
మిత్రుడిని కోల్పోయిన బాధలో ఉన్న కుటుంబానికి ఆర్థిక సహాయం అందించడమే కాకుండా.. “నీ కుటుంబం మాది.. నీ కష్టం మాది” అనే భరోసాను అందించారు.
చదువు పూర్తై దశాబ్దాలు గడిచినా.. మిత్రత్వాన్ని మరచిపోకుండా, తోటి మిత్రుల కుటుంబాలకు అండగా నిలవడం నిజంగా అభినందనీయమని పలువురు ప్రశంసిస్తున్నారు.
స్నేహం అంటే కలిసి చదువుకోవడం మాత్రమే కాదు.. కష్టకాలంలో ఒకరికొకరు అండగా నిలవడమే నిజమైన మిత్రత్వం.
ధర్మారం జెడ్‌పీహెచ్‌ఎస్ 1993–94 బ్యాచ్ పూర్వ విద్యార్థులు చేస్తున్న ఈ సేవా కార్యక్రమం ఇతర పూర్వ విద్యార్థులకు, సమాజానికి కూడా ఒక స్ఫూర్తిదాయకమైన ఉదాహరణగా నిలుస్తోంది. మిత్రత్వం, మానవత్వం, పరస్పర సహకారం ఉంటే.. ఆపదలో ఉన్న ఒక కుటుంబానికి ఎంతో పెద్ద అండగా నిలవవచ్చని ఈ మిత్రబృందం నిరూపించింది.