మహిళల భద్రతపై అవగాహన కలిగి ఉండాలి కేఎంసీ ఫార్మసీ కళాశాలలో షీ టీమ్ అవగాహన సదస్సు

వరంగల్: మహిళల భద్రతకు ప్రతి ఒక్కరూ బాధ్యతగా వ్యవహరించాలని, అప్రమత్తంగా ఉండటం ద్వారా మహిళలపై జరిగే నేరాలను అరికట్టవచ్చని వరంగల్ షీ టీమ్ ఎస్సై రామారావు అన్నారు. వరంగల్‌లోని కేఎంసీ ఫార్మసీ కళాశాలలో సుమారు 120 మంది విద్యార్థినులకు మహిళల భద్రత, సైబర్ నేరాలు, టీ-సేఫ్ అనువర్తనంపై అవగాహన సదస్సు నిర్వహించారు.

ఈ సందర్భంగా ఎస్సై రామారావు మాట్లాడుతూ, సామాజిక మాధ్యమాలైన ఫేస్‌బుక్, ఇన్‌స్టాగ్రామ్, స్నాప్‌చాట్, టెలిగ్రామ్‌లలో వ్యక్తిగత ఫొటోలు, వివరాలను పంచుకునే విషయంలో విద్యార్థినులు అప్రమత్తంగా ఉండాలని సూచించారు. సైబర్ నేరాల పట్ల అవగాహన పెంపొందించుకోవాలని, గుర్తుతెలియని వ్యక్తులతో వ్యక్తిగత విషయాలను పంచుకోవద్దని తెలిపారు.

మహిళలు ఒంటరిగా తెలియని ప్రదేశాలకు ప్రయాణించాల్సి వచ్చినప్పుడు టీ-సేఫ్ అనువర్తనాన్ని వినియోగించుకోవాలని సూచించారు. ఉద్యోగ ప్రదేశాల్లో అసభ్యకరంగా ప్రవర్తించే వ్యక్తులు, ఆకతాయిల పట్ల జాగ్రత్తగా ఉండాలని చెప్పారు. ఎవరైనా మహిళల పట్ల అనుచితంగా లేదా అసభ్యంగా ప్రవర్తిస్తే భయపడకుండా వెంటనే షీ టీమ్ పోలీసులకు సమాచారం అందించాలని కోరారు.

సైబర్ నేరాలకు గురైతే జాతీయ సైబర్ నేరాల ఫిర్యాదు సహాయ నంబరు 1930కు ఫిర్యాదు చేయాలని సూచించారు. మహిళల భద్రతకు సంబంధించి ఫిర్యాదులు చేసేందుకు వరంగల్ షీ టీమ్ సంప్రదింపు నంబర్లను కూడా వివరించారు.

పోలీస్ కమిషనర్ వాట్సాప్ నంబరు: 8712685257

సీఐ వాట్సాప్ నంబరు: 8712685142

ఎస్సై వాట్సాప్ నంబరు: 8712685270

ఫిర్యాదు చేసిన వారి వివరాలను గోప్యంగా ఉంచుతామని, నేరాలకు పాల్పడిన వారికి కౌన్సెలింగ్ నిర్వహించడంతో పాటు చట్టప్రకారం తగిన చర్యలు తీసుకుంటామని ఎస్సై రామారావు తెలిపారు.

ఈ కార్యక్రమంలో కేఎంసీ ఫార్మసీ కళాశాల ప్రిన్సిపాల్ సువచల, అడ్మినిస్ట్రేటివ్ సిబ్బంది పద్మజ, షీ టీమ్ ఎస్సై రామారావు, ఇతర సిబ్బంది పాల్గొన్నారు.