రూపా రెడ్డి హత్య కేసు ఛేదన.. నల్లగొండ పోలీసులకు కృతజ్ఞతల వెల్లువ

పోలీసుల పనితీరుపై ప్రశంసల వర్షం.. దర్యాప్తు బృందానికి అభినందనలు

నల్లగొండ: రూపా రెడ్డి హత్య కేసును పోలీసులు ఛేదించడంతో నల్లగొండ జిల్లా పోలీసులపై ఉపాధ్యాయులు, విద్యార్థులు ప్రశంసలు కురిపిస్తున్నారు. కేసు దర్యాప్తును వేగవంతం చేసి, నిందితులను గుర్తించడంలో కీలకంగా వ్యవహరించిన పోలీసు అధికారులకు పాఠశాల యాజమాన్యం, ఉపాధ్యాయులు, విద్యార్థులు ప్రత్యేకంగా కృతజ్ఞతలు తెలిపారు.కేసు దర్యాప్తులో పోలీసులు రాత్రింబవళ్లు శ్రమిస్తూ ప్రతి ఆధారాన్ని క్షుణ్ణంగా పరిశీలించినట్లు వారు పేర్కొన్నారు. ఘటన అనంతరం భయాందోళనకు గురైన తమకు పోలీసుల దర్యాప్తు ధైర్యం, భరోసా కల్పించిందని ఉపాధ్యాయులు, విద్యార్థులు తెలిపారు.

ఎస్పీ శరత్ చంద్ర పవార్ నేతృత్వంలో పకడ్బందీ దర్యాప్తు కొనసాగించడంతో కేసు త్వరితగతిన కొలిక్కి వచ్చిందని వారు ప్రశంసించారు. వివిధ కోణాల్లో ఆధారాలను సేకరించి, వాటిని విశ్లేషిస్తూ నిందితులను గుర్తించడంలో పోలీసు బృందం చూపిన అంకితభావాన్ని అభినందించారు.“కేసును ఛేదించేందుకు పోలీసులు అహర్నిశలు శ్రమించారు. వారి కృషిని జీవితాంతం మర్చిపోలేం” అంటూ ఉపాధ్యాయులు, విద్యార్థులు భావోద్వేగంతో కృతజ్ఞతలు తెలిపారు.నల్లగొండ జిల్లా పోలీసుల మధ్య సమన్వయం, అధికారుల అంకితభావంతోనే కేసు త్వరగా ఛేదించబడిందని వారు పేర్కొన్నారు. ప్రజల్లో భరోసా కల్పించేలా పోలీసులు వ్యవహరించడం అభినందనీయమని అన్నారు.
బాధిత కుటుంబానికి న్యాయం జరిగేలా చర్యలు

బాధిత కుటుంబానికి న్యాయం జరిగేలా చట్టపరమైన ప్రక్రియను వేగవంతం చేస్తామని ఎస్పీ శరత్ చంద్ర పవార్ తెలిపారు. కేసులో త్వరితగతిన చార్జ్‌షీట్ దాఖలు చేసి, నిందితులకు చట్టప్రకారం శిక్ష పడేలా చర్యలు తీసుకుంటామని ఆయన పేర్కొన్నట్లు తెలిపారు.రూపా రెడ్డి హత్య కేసును ఛేదించేందుకు రాత్రింబవళ్లు శ్రమించిన నల్లగొండ జిల్లా పోలీసు అధికారులకు, దర్యాప్తు బృందానికి ఉపాధ్యాయులు, విద్యార్థులు మరోసారి కృతజ్ఞతలు తెలిపారు.నేరాన్ని ఛేదించి ప్రజల్లో భరోసా నింపిన నల్లగొండ జిల్లా పోలీసులకు సెల్యూట్ అంటూ అభినందనలు వెల్లువెత్తుతున్నాయి.